Román González (GañaMós): "En catro anos imaxino un Mos cun proxecto de casco urbano en marcha"

En poucas palabras, por que os veciños e veciñas de Mos deben escoller a papeleta de GañaMós?

En primeiro lugar, porque somos o único grupo que ten un programa de goberno real pensado e feito para os veciños e veciñas. Somos un partido totalmente honesto, transparente e leal á veciñanza, como así o demostramos ao longo da lexislatura. Estamos do lado da veciñanza en canto a anulación da modificación do PXOM para evitar o pelotazo urbanístico nos montes de Tameiga. Temos un proxecto de atención aos nosos maiores, como converter o vello Rebullón nun centro socio sanitario, algo que o goberno do PP nos plaxiou no seu programa.

Másnoticias

La Navidad de O Porriño prepara una gran pista de patinaje sobre hielo gratuita

21/11/2024

O Porriño estrena nuevo parque infantil en Atios y anuncia cambios en otros cinco

21/11/2024

Como te imaxinas o Mos de dentro de catro anos?

Totalmente apacible e no que os nosos mozos queiran quedarse. Cun proxecto de vivendas de Protección Oficial adaptado as súas necesidades para que non teñan que emigrar a outros concellos. Un Mos cun proxecto de casco urbano en marcha e cun plan de emprego adaptado as necesidades do concello.

Que retos ten Mos a nivel cultural?

Temos que crear un consello de asociacións culturais para que teñan cabida todas as asociacións -que son moitas- e poder poñerse de acordo para que non se solapen os actos de unhas e outras. Aí queremos debater as melloras e propostas para o mellor funcionamento do tecido cultural que é tremendamente rico. Tamén queremos mellorar a sinalización do Camiño de Santiago, que é algo que se está demandando con urxencia.

Como veciño de Tameiga e coa polémica que rodea ao proxecto de Mouriño, consideras que estas eleccións son fundamentais para Mos?

Fundamentais é quedarse corto. É de extrema importancia para o conxunto de todo Mos. Se Nidia Arévalo logra unha maioría absoluta non cabe dúbida de que haberá unha guerra entre Nidia Arévalo -que vai intentar expropiar este monte para cederllo a unha entidade privada- e as veciñas e veciños que nos imos poñer diante das escavadoras e de quen faga falta. Por iso son tremendamente importantes estas eleccións.

Se es alcalde, que farás co proxecto do Celta?

O primeiro será eliminar esa modificación puntual do PXOM si ou si. Se o señor Mouriño quere traer un centro comercial, temos o Polígono Industrial da Veigadaña que está practicamente baleiro. Aí sería unha opción para un centro comercial, pero a única posibilidade real e concreta é eliminar esa modificación do PXOM e non dar cabida ao pelotazo urbanístico.

A renuncia do anterior voceiro, Francisco Vázquez Troitiño, non vos prexudica?

Hoxe penso que non. O traballo feito en GañaMós dende que Troitiño deixou o grupo fortaleceuse, mellorou e foi sempre cara adiante, non se mirou debilitado en ningún momento.

Antes de comezar a campaña o PP defundiu supostas ilegalidades na reforma da túa vivenda, que tes que dicir?

Non vou a entrar ao trapo na política de salsa rosa de Nidia Arévalo. Demostra que o traballo tan mal feito do seu goberno o quere disimular sacando política basura e propaganda dunha persoa que, a día de hoxe, non é nin cargo público. Está nas mans dos avogados e nas próximas datas se saberá algo. É unha publicidade rastrera que demostra o que é o Partido Popular e Nidia Arévalo.

Que farías nos teus primeiros 100 días de goberno?

Faremos unha auditoría para saber o estado real das contas do Concello. Está moi endebedado e intervido polo Ministerio de Facenda. Queremos saber as facturas que se deben, porque temos coñecemento de que moitos provedores e pequenos empresarios están sen cobrar por esta pésima xestión económica de Nidia Arévalo. En segundo lugar, eliminaremos a modificación puntual do PXOM.

Como faredes para facer fronte a esas débedas e á vez desenvolver o voso programa?

Coa auditoría -na que se se demostra que houbo fraude o goberno de Nidia Arévalo acabará nos tribunais- poderemos saber o que poderemos facer. Marcaremos unha orde de prioridades, porque senón sería facer unha política de promesas. Non practicamos esa vella política.

Botades en falta veciños de máis parroquias?

Si, é complicado lograr que a xente se involucre, pero estamos moi contentos coa lista que temos. Está xente moi competente, preparada e con moitas ganas e agora mesmo non botamos en falta nada.

Estariades abertos a formar un goberno tripartito se o PP non logra maioría absoluta?

Estamos destinados a entendernos. En función dos resultados debemos sentarnos e non levantarnos até chegar a un acordo polo ben do Concello de Mos ten que ser así. É innegociable.

Falabas dun casco urbano que Mos non ten, onde sería?

Hai varias opcións. Ampliar a zona residencial de Sanguiñeda que é case unha prolongación do casco do Porriño, ou senón intentar ampliar a zona de San Eleuterio coa creación dun novo polígono de vivendas de protección oficial. Tamén poderíase ampliar a zona de Puxeiros.  Estas opcións teñen que estar unidas a eliminar a peaxe da AP9 para reducir o tráfico da A55 -unha estrada da morte- e humanizar ese vial polo paso das zonas residenciais e poder modificar o PXOM.

Ser un concello limítrofe con Vigo ten prexudicado máis que beneficiado a Mos?

Está claro que a A55 é unha ferida que leva moitos anos facendo sangrar a Mos. O Concello está dividido por esa autovía. A nosa proposta, que foi levada ao Congreso, é lograr a eliminación da peaxe na AP9 para poder desviar o tráfico.  Esa proposta, tras moito traballo, foi aprobada polo Congreso e o PP con Mariano Rajoy negouse ilegalmente a levala a cabo e agora o PSOE tampouco parece que queira. Nidia Arévalo vetouna no Concello e agora se mostra como valedora cando no seu día a vetou.

Es partidario de reactivar a Área Metropolitana?

É completamente necesario para todos os concellos da área e do propio concello de Vigo. Somos totalmente partidarios.

Que gran proxecto lle gustaría a GañaMós facer ao fronte da alcaldía?

 A creación dese casco urbano, a dinamización do pequeno comercio e a liberación do tráfico na A-55 sería algo moi positivo. Pero tamén hai propostas a nivel cultural ou deportivo.

GañaMós - Asemblea Veciñal