As novas rutas guiadas de Moaña suman o sendeiro da Fraga e os seus muíños

Volven as rutas gratuítas e guiadas a través do patrimonio natural e cultural de Moaña. Tralo éxito da primeira edición, que contou con máis de 300 participantes, a concellería de Turismo repite programa para volver a ofrecer oito visitas guiadas que, como novidade, incorporan o Sendeiro da Fraga.

As rutas, que se celebran nas fins de semana, entre abril e maio, guiarán aos asistentes a través da natureza e a vida marítima, o pasado do municipio e as súas canteiras, dos barrios históricos ou das mulleres que fixeron historia.

Másnoticias

Abre el plazo para apuntarse a las nuevas rutas gratis de "Voando nas Rías Baixas"

07/06/2026

El nuevo fenómeno gastro que arrasa en redes sociales aterriza en un restaurante asiático de Vigo

07/06/2026

Co obxectivo de potenciar o “turismo autóctono e de proximidade”, nas verbas da concelleira de Turismo, Coral Ríos, apóstase por ofrecer estas visitas aínda en temporada baixa, para “desestacionalizar o turismo e atraer a visitantes que despois consumen en Moaña”, toda vez que permite aos veciños “coñecer o seu entorno máis próximo”.

O programa, en colaboración coa asociación A Illa dos Ratos, encargados da guía, “están pensadas para todos os públicos, cunha visión amena e para que a xente pase un bo rato”.

Como novidade no programa, incorpórase a Senda da Fraga, na súa variante de catro quilómetros. Este percorrido, que arranca na desembocadura do río no areal da Xunqueira, continuará durante 4 quilómetros -é a visita máis longa- para dar a coñecer “a importancia dos ríos, do seu ecosistema e do uso dos muíños”. De feito, este sendeiro conta con até unha trintena de muíños que noutra época eran de vital importancia na agricultura do Morrazo.

Para poder participar nesta visitas de balde, soamente é necesario realizar a inscrición previa a través de [email protected]. Todas as visitas comezan ás 11:00 horas.

Rutas e visitas guiadas gratuítas

“Intermareal de Tirán”.Esta visita guiada, moi interactiva, está especialmente enfocada para toda a familia permitíndonos realizar un percorrido polas praias para coñecer a súa biodiversidade aproveitando para recoñecer bivalvos, crustáceos ou estrelas de mar.

• Cando?Sábado 6 e 20 de abril
• Onde?Capela de San Xoán de Tirán
• Como? 1,5 quilómetros e circular

San Martiño. A visita apenas nos obrigará a camiñar, xa que soamente percorreremos a contorna da igrexa. Os asistentes descubrirán a historia das casas e como apareceron aí e outros elementos propios dun dos barrios senlleiros do municipio.

• Cando?Sábado 13 de abril
• Onde?Igrexa de San Martiño
• Como? 1 quilómetro – circular

Sendeiro da Fraga. Trátase da visita máis longa, con 4 quilómetros de dificultade media. Comezará na Praia da Xunqueira e rematará no “Torreiro do Muíño”. Ao longo do camiño os asistentes penetrarán nun ecosistema natural e fluvial que foi de vital importancia no pasado. Boa conta disto dan os 30 muíños construídos seguindo o curso do río.

• Cando?Domingo, 28 de abril
• Onde?Praia da Xunqueira
• Como? 4 quilómetros – lineal

“Mulleres da historia de Moaña” Porase en valor o papel da muller dentro do desenvolvemento da sociedade e a vila de Moaña. Historias que paga a pena coñecer sobre figuras importantes con nome propio como Lela Soage, Elisa de la Peña, Lola Diz ou Concepción Arenal, fortemente vencellada ao municipio, que se mesturarán con alusións a colectivos máis anónimos como as peixeiras, as mariscadoras ou as carreiras.

• Cando?Sábado, 11 de maio
• Onde?Estación Marítima de Moaña
• Como? 2 quilómetros - lineal

“Moaña Mariñeira”. Percorre a historia do municipio e as súas xentes. Ao longo deste percorrido polo litoral entre o Porto de Moaña e o Porto de Meira os asistentes coñecerán detalles dos inicios da pesca tradicional, a historia do Pósito de Moaña e a figura do seu impulsor D. Jose Costa Alonso ou algúns dos naufraxios máis importantes que afectaron as familias de Moaña.

• Cando?Domingo 12 e 26 de maio
• Onde?Porto de Moaña e remata no Porto de Meira
• Como? 2,6 quilómetros – lineal

“Canteiras do litoral de Moaña”. Ao longo do percorrido os asistentes descubrirán a historia que agochan as antigas canteiras do litoral de Moaña e que foron a orixe do crecemento económico e social da vila. Co paso do tempo e o desmantelamento das canteiras, eses novos espazos serviron de ubicación para novas actividades empresariais relacionadas co mar, como no caso do estaleiro ASCON ou de Conservas A Guía.

• Cando?Sábado, 18 de maio
• Onde?Canteira do Cocho (Ao carón do Colexio da Guía).
• Como? 2 quilómetros - lineal