Cangas xa viviu o seu “inverno en ruta” e, agora, a primavera non será menos. O Concello celebrará entre o 7 de abril e o 27 de maio dezaseis visitas que compoñen nove rutas distintas ao longo do municipio.
Como novidade, nesta edición incorpóranse “Cangas e o mar”, na que se expoñen contidos relacionados coa pesca tradicional e a chegada da industrialización, “A historia das mulleres de Cangas”, na que se fai un percorrido polas figuras relevantes da historia do pobo como María Soliño, Fina Acuña ou Dolores Blanco, ou “Muíños de Coiro”, que se realizará coincidindo coa Festa do Muíño de Fausto.
Tampouco faltarán as xa tradicionais e populares, como “Massó: o sentir dun pobo”, coa que se fai un repaso á historia da que chegou a ser a maior factoría conserveira de Europa nos anos 50, ou “Cangas 1617: A defensa da vila”, a través da cal se abordan os feitos acontecidos no ano 1617 cando un grupo de piratas turco-berberiscos arrasaron este municipio.
Pódeche interesar: Descubre as rutas medioambientais de Camiño a Camiño
O programa de “Primavera en Ruta” desenvolverase os sábados e domingos de abril e maio e seguirán a ser de balde. As prazas son limitadas, polo que é necesario inscribirse na Oficina de Turismo de Cangas (986392023) ou a través do email ailladosratos@gmail.com indicando nome, idade, ruta escollida e un teléfono de contacto. Todas as visitas sairán ás 11:00 horas.
A iniciativa é parte da Concellería de Medio Ambiente e Turismo, dirixida por Tania Castro, en colaboración coa asociación A Illa dos Ratos.
*Foto de portada: Turismo de Cangas
