Últimas prazas para participar nos roteiros que amosan os encantos de Moaña

Moaña quere compartir a súa beleza. Amosar os encantos que agarda, tesouros que van máis aló das súas praias. Con este obxectivo nace o programa "Descubre Moaña", unhas rutas guiadas e gratuítas que leva a cabo o Concello en colaboración coa asociación A Illa dos Ratos. En total serán 24 rutas con seis temáticas diferentes.

As saídas que compoñen este programa de "Descubre Moaña" comezan este sábado 2 de febreiro coa ruta "Moaña Mariñeira", que permitirá coñecer a historia da localidade e a das súas xentes. O éxito e as gañas por coñecer o concello da comarca do Morrazo fan que as prazas dos diferentes percorridos estean preto de esgotarse, polo que todas as persoas interesadas deberán inscribirse previamente no 611 08 08 53 ou a través do correo electrónico de ailladosratos@gmail.com.

Coñece as rutas que compoñen "Descubre Moaña"

O programa de “Descubre Moaña” comeza este sábado, 2 de febreiro, coa ruta de “Moaña Mariñeira” que percorre a historia do municipio e as súas xentes. Ao longo deste percorrido polo litoral entre o Porto de Moaña e o Porto de Meira os asistentes coñecerán detalles dos inicios da pesca tradicional, a historia do Pósito de Moaña e a figura do seu impulsor D. Jose Costa Alonso ou algúns dos naufraxios máis importantes que afectaron as familias de Moaña.

Tamén visitarán e estaleiro de Carlagho, sede da Asociación Sueste, no que poderán coñecer o interior dunha carpintería de ribeira e o museo aberto das Carreiras de Meira.

• Cando? Sábados 2 e 16 de febreiro
• Onde? Porto de Moaña e remata no Porto de Meira

Tamén impregnada de sabor marítimo estará o segundo dos roteiros, titulado “Canteiras do litoral de Moaña”. Ao longo do percorrido os asistentes descubrirán a historia que agochan as antigas canteiras do litoral de Moaña e que foron a orixe do crecemento económico e social da vila. Co paso do tempo e o desmantelamento das canteiras, eses novos espazos serviron de ubicación para novas actividades empresariais relacionadas co mar, como no caso do estaleiro ASCON ou de Conservas A Guía.

• Cando? 9 de febreiro e 30 de marzo
• Onde? Canteira do Cocho (Ao carón do Colexio da Guía).

Sen abandonar a franxa litoral os roteiros levarannos á “Intermareal de Tirán”. Esta visita guiada, moi interactiva, está especialmente enfocada para toda a familia permitíndonos realizar un percorrido polas praias para coñecer a súa biodiversidade aproveitando para recoñecer bivalvos, crustáceos ou estrelas de mar.

• Cando? 23 de febreiro e 23 de marzo
• Onde? Capela de San Xoán de Tirán

Co obxectivo de visibilizar ás “mulleres da historia de Moaña” en colaboración co Centro de Información á Muller, a zona do Porto acollerá un roteiro o 9 de marzo. Desta vez porase en valor o papel da muller dentro do desenvolvemento da sociedade e a vila de Moaña. Historias que paga a pena coñecer sobre figuras importantes con nome propio como Lela Soage, Elisa de la Peña, Lola Diz ou Concepción Arenal, fortemente vencellada ao municipio, que se mesturarán con alusións a colectivos máis anónimos como as peixeiras, as mariscadoras ou as carreiras.

• Cando? 9 de marzo
• Onde? Por determinar. Zona do Porto.

Por último, no campo da historia, estas novas visitas achegarannos ao barrio moañés de San Martiño. Desta vez a visita apenas nos obrigará a camiñar, xa que soamente percorreremos a contorna da igrexa. Os asistentes descubrirán a historia das casas e como apareceron aí e outros elementos propios dun dos barrios senlleiros do municipio.

• Cando? 16 de marzo
• Onde? Igrexa de San Martiño