O Armadiña Rock volve con tres días de música de balde con Heredeiros da Crus como protagonistas

Esta fin de semana celebrase na parroquia de Combarro (Poio), un dos festivais máis característicos e singulares do panorama musical galego, o Armadiña Rock 2019, onde a música será o punto transversal de todas as actividades que haberá.

Dende o xoves ata o domingo non deixará da soar a música en ningún punto de Combarro porque os diferentes escenarios estarán repartidos pola toda a parroquia. Na Praza da Chousa serán os principais concertos, que estará secundada polo escenario da Praza da Rualeira e Praza de San Roque. O Recinto histórico de Combarro e o Peirao da Rúa tampouco quedaranse atrás.

A súa XI ven cargada de grandes novidades, entre elas destaca que por primeira vez haberá pregoeiro do festival e unha “Zona Lounge” onde o sábado poderase desfrutar da boa música coa axuda dunha DJ situada na Praza da Rualeira. ´

O xoves 22 de agosto, o cantautor compostelán, Xosé Constenla, será o encargado de dar o comezo do evento dando o pregón ás 20:00 horas na Praciña da Ruacega. Para despois dar un concerto en acústico a partir das 20:15 horas no mesmo lugar. Este recital despedirá o seu disco “Virada por Avante” do mesmo xeito que naceu, coa guitarra e voz de Xosé, unha actuación que ademais será gravada en vídeo.

O primeiro día, o venres 23, da Armadiña podería considerarse coma “o día grande” pola presenza de Uxía Lambona e a Banda Molona, High Paw & EY, Herdeiros da Crus, NAO, Bastards on Parade, entre outros. A encargada de estrear a xornada será Uxía Lambona e a Banda Molona ás 18:30 horas na Praza de San Roque, onde todos os nenos e nenas poderán gozar do seu marabilloso espectáculo. Posteriormente será a quenda de Asacirco na Praza de Chousa ás 20:00 que serán os teloneiros dos grandes concertos do día nese mesmo lugar. Ás 21:30 horas asaltarán o escenario os vigueses High Paw & Elephants Yard coa súa música reggae. Posteriormente Heredeiros da Crus fará soar os seus grandes clásicos do rock galego en Combarro ás 22:40 horas. Os seguintes en subirse ao escenario serán NAO, grupo que anunciou a súa retirada dos escenarios tras a xira 2019. Para rematar, o punk-rock dos coruñeses, Bastards on Parade, ás 02:35 horas.

Se a programación do venres non chegou, o sábado estará cheo de música dende o mediodía ata ben entrada a madrugada. Dende Vigo acoden por primeira vez a Combarro co seu punkfolk, Falperrys, nunha sesión vermú na Praza da Rualeira ás 13:00 horas. DJ Beti de la Church amenizará a “Zona Lounge” ás 16:00 horas para que a festa non pare. Pola tarde celébranse dúas “sesións frescas” por parte de Sote e The Tetas’Van na Praza da Rualeira. O artista combarrés cantará ás 17:45 e os ourensáns ás 18:30. Como pasou no día anterior, Patty Diphusa será a encargada de quentar ao público para outra noite de concertos na Praza da Chousa, a súa actuación arrincará ás 19:30 horas.

Los Jinetes del Trópico abrirán os grandes concertos do sábado ás 20:30 horas e estarán seguidos por Familia Caamagno ás 21:40 horas, que farán parada en Combarro tras pasar por festivais coma O Son do Camiño ou Morrasound, Dubioza Kolektiv, unha das grandes atraccións desta edición, coa súa música folclórica dos Balcáns combinada con hip hop, reggae, dub e rock asaltarán o escenario na Chousa ás 00:50 horas. Posteriormente será a quenda dunha das bandas máis representativas do rap en galego, Dios ke te crew, ás 02:40 horas. Balkan Bomba serán os encargados de pechar a festa ás 03:45 horas.

Ukestra do Medio porá o ramo ao Armadiña Rock 2019 cunha sesión vermú na Praza da Rualeira ás 13:00 horas do domingo 25.

Dentro da programación do festival haberá coloquios, actividades para máis pequenos e pequenas da casa e pasarrúas. O primeiro coloquio terá lugar o sábado ás 17:30 na Praza da Rualeira co tema de “Música e revolución”. E o segundo e derradeiro terá lugar no Peirao da Rúa ás 17:30 horas e tratará dos “Festivais galegos creados por colectivos sen ánimo de lucro”.

As pasarrúas teñen unha notable presenza dentro do programa do Armadiña Rock. O venres polo Recinto histórico de Combarro ás 19:30 estarán as Pandeireteiras de Ronsel e Armadiña. Por outra banda, na mesma zona, o sábado estarán Pinguela Terra de Montes ás 12:00 do mediodía; e Brassica Rapa ás 17:30.

O sábado haberá obradoiros infantís na Escola do Campo ás 12:00 ata as 14:00; e actividades infantís na Acampada entre as 17:00 e 19:00.

O festival terá zona de acampada con servizo de duchas e aseos situada nas inmediacións da Reiboa (A Seca) a dez minutos andando dende o recinto de concertos. Terá unha capacidade de 1.500 tendas e estará aberta ata completar aforo. Poderase acampar dende o venres ata o domingo.

O prezo do Armadiña Rock, coma sempre, é gratuíto para todas as persoas que queiran asistir para gozar a boa música aproveitando a visita dun dos espazos máis bonitos do país.

Deja un comentario

Tu dirección de correo electrónico no será publicada. Los campos obligatorios están marcados con *

*