Moura, Desert' Smoke e Mascada protagonizan un triplo concerto de stoner rock en Mos

Unha oportunidade irrepetible de presenciar en directo a algunhas das mellores bandas do rock progresivo e do stoner da Península Ibérica. O sábado 24 de febreiro, a Sala Rebullón organiza un "mini festival" que contará con tres grupos de referencia no stoner rock: os galegos Moura, os portugueses Desert’Smoke e os tamén galegos Mascada. A entrada anticipada ten un prezo de 15 euros a través da plataforma Vivetix, mentres que en billeteira terá un prezo de 18 euros.

Moura, coa súa mistura de rock progresivo, psicodelia e tradición galega, é sen dúbida unha das bandas de rock máis interesantes do panorama estatal. E proba disto é o seu paso por citas de primeiro nivel, coma o Resurrection Fest, Monkey Week, Sound Isidro, Festival de La Luz, SonicBlast, Festival Noroeste ou Los Conciertos de Radio 3, entre outras. En 2023 presentaron ao vivo 'Axexan, espreitan', o seu segundo disco, e embriagaron co seu aquelarre sonoro a tódalas persoas que presenciaron algún dos seus concertos.

Másnoticias

Nace un nuevo festival en distintos escenarios de Nigrán con conciertos gratis durante el atardecer

21/07/2026

Un evento gratuito convertirá una azotea de Vigo con vistas a las Cíes en el epicentro de la música electrónica

21/07/2026

Pola súa banda, Desert' Smoke atópase entre o mellor do stoner e do rock psicodélico portugués. Os de Lisboa gozan de prestixio e lograron captar a atención de importantes festivais, como o SonicBlast ou o Woodrock, entre outros. Con dous discos editados, Desert’ Smoke presentará un espectáculo de rock poderoso cunha potente sección rítmica, unha auténtica viaxe ao deserto da man do cuarteto portugués. En febreiro deste 2024, ano no que lanzarán o seu novo traballo, o grupo comeza a súa primeira xira por Europa, que os levará por escenarios de Portugal, Francia, Suíza, Italia e España, con parada na Rebullón o 24 de febreiro.

Por último, Mascada tamén destaca pola súa proposta de rock en galego. O dúo, baixo e batería, destila adrenalina e actitude, con influencias do stoner, a psicodelia e mesmo do rock progresivo. Beben de todos estes estilos, pero sobre todo do ecosistema musical que lles rodea. Cantan en galego porque viven en galego. É a forma máis sincera e verdadeira de liberar no micro o que lles sae de dentro. Utilizan a lingua con total naturalidade, fuxindo de clixés e etiquetas políticas. Da mesma maneira tamén confían no poder de expresión da propia música, polo que dan cabida a temas 100% instrumentais.