“No bico un cantar” reunirá un coro de 500 nenos e nenas en Tui

Uns 500 nenos e nenas de todas as provincias galegas, ademais de unha delegación de Portugal con rapaces de Valença e Fafe, daranse cita en Tui dentro da sétima edición de “No bico un cantar”.

A cita da que a vila baixomiñota converterase en anfitrioa, celebrarase o venres 7 de xuño ás 17:30 horas na Praza de San Fernando e trátase dun proxecto impulsado polo Consello da Cultura Galega e a Xunta co obxectivo de dar a coñecer poetas galegos dende o punto de vista musical.

Másnoticias

La experiencia de "La Casa de Papel" llega al área de Vigo con una prueba inmersiva en Tui

20/07/2026

Tui descubre su memoria democrática con una visita guiada completamente gratuita

20/07/2026

A edición deste ano toma o título de “Nenos e nenas cantan na Raia” facendo referencia a participación tamén de alumnado de dous centros musicais de Portugal.

Os 500 participantes interpretarán un total de cinco pezas, “San Campio, romaría galega”, do poeta tudense Manuel Lago González musicado por Torres Creo, “Veira dó mar” de Pío Lino Cuíñas con música de Reveriano Soutullo e a terceira peza será a canción popular portuguesa “Oh rama oh que rama linda”. En cuarto lugar poderá escoitarse por vez primeira a versión musical do poema de Xosé Maria Álvarez Blázquez, “No Rego do Prado” con música do xove compositor compostelán Alexis Rozas, que realizou expresamente para esta ocasión. O broche de ouro coma en edicións anteriores porao o poema de Rosalía de Castro “Maio longo” pertencente a Follas Novas.

No evento estarán alumnos e alumnas dos conservatorios da Coruña, Xan Viaño (Ferrol), Xoán Montes (Lugo), Ourense, Manuel Quiroga (Pontevedra) , Santiago de Compostela e Vigo. Ademais dos alumnos e alumnas de 13 centros musicais, entre eles a Escola de Música Municipal de Tui, o Conservatorio de Música Elemental da Guarda, a Escola de Música da Agrupación Musical do Rosal e a Escola de música da Asociación Amigos da Música de Salceda de Caselas. Pola parte portuguesa ademais, convidouse a participar á Academia de Música da Fortaleza de Valença e á Academia de Música José Atalaya de Fafe.

O recoñecido pianista e director Maximino Zumalave repite como responsable artístico do proxecto. Canda el, tamén volve participar o grupo de metais Hércules Brass, un quinteto de diferentes instrumentos (trompeta, trompa, trombón e tuba), ao que se incorpora un músico para conformar un sexteto. Repite como mantedora do programa a escritora Rosa Aneiros.