O Festival Groba incorpora o vento-metal co mellor trompetista do mundo

Ponteareas volverá ser entre o 18 e o 24 de agosto a referencia galega da música clásica da man do Festival Groba. Artistas internacionais como a violinista surcoreana Jiyoon Lee ou o pianista italiano Sandro D’Onofrio participarán este ano nun festival “especial”, así bautizado esta mañá polo secretario xeral de Cultura da Xunta de Galicia, Anxo Lorenzo, na presentación oficial da súa sexta edición.

O evento permite cada ano desfrutar da música dun dos creadores galegos máis importantes, Rogelio Groba Groba. O compositor máis prolífico de Galicia conta con máis de 700 obras especialmente pensadas para coro, música de cámara, piano, orquestras de cordas e bandas sinfónicas.

Másnoticias

La orquesta París de Noia desvela todas sus fechas en Galicia en junio, varias en el área de Vigo

03/06/2026

Piden 4 años de cárcel para dos acusados de robar en viviendas del área de Vigo con diferentes tretas

31/05/2026

Porén, como gran novidade, este ano o festival virará cara o metal coa presenza do que está considerado como “o mellor trompetista do mundo”, nas verbas do director artístico do festival, Rogelio Groba. Pacho Flores, gañador do primeiro premio do prestixioso concurso internacional “Maurice André” así como do Philip Jones e o Cittá dei Porcia. Recentemente convertido en artista exclusivo da Deutsche Grammophon mostrará a súa calidade musical o sábado, 18 de agosto, no concerto inaugural e o domingo 19 acompañado por dous violíns, viola, cello e contrabaixo.

Aínda no metal, o festival contará cos gañadores do primeiro premio eMuse, a Hércules Brass, caracterizada polo seu amplísimo e ecléctico repertorio. O quinteto galego será o encargado de estrear a obra Distorsións Ubedianas do mestre Groba, dedicada á creación do pintor pontevedrés Rafael Úbeda, segundo adiantou Rogelio Groba Otero.

Outra das novidades é a actuación dun dos coros máis importantes do panorama europeo, o Coro de Cámara de Pamplona, que interpretará, xunto á OCGA , a emblemática Cantata, Cantigas de Mar, con textos de Filgueira Valverde e realizará a estrea mundial dunha das últimas obras compostas polo mestre Groba, Rosalía na Catedral, obra que pon música ao poema de Rosalía de Castro en 8 movementos.

Ademais das obras do mestre Groba, formarán parte dos repertorios dos concertos de cada noite moitos outros compositores como J. Neruda, C. Saint- Saëns, G. Faure, Mozart, E. Granados, Mendelsson, J. Turina, Beethoven… En canto á academia, este ano estará dedicado ás masterclasses de trompeta, cello, violín, viola, cello, piano e música de cámara.

O Auditorio Municipal de Ponteareas será a sede de cada un dos concertos, que arrancarán diariamente ás 21:00 horas, agás o xoves, 23 de agosto, cando se celebre no salón de plenos do Concello.

Actividade divulgativa

Con todo, o Festival Grova “non destaca só polas actuacións de gran calidade senón tamén pola súa parte formativa na que conviven os diferentes artistas”, segundo destacou o deputado provincial de Cultura, Xosé Leal.

Precisamente o alcalde, Xosé Represas, afondou na idea de que esta cita musical servirá para “promocionar e dar oportunidade aos novos talentos que nesta semana ademais de ofrecer concertos tamén aprenden dos mellores mestres da actualidade”.

Na VI edición do Festival Groba, os obxectivos seguen a ser a divulgación da música do compositor Rogelio Groba, o fomento do estudo da música clásica e establecer as canles que faciliten a aprendizaxe con mestres internacionais que complementen a súa formación e, desde Ponteareas, continuar mantendo o nome de Galicia como punto de referencia da música de cámara desde o máis alto nivel internacional.