O Sinsal Primavera cítase esta fin de semana en Vigo con cinco concertos femininos de vangarda

Vigo acollerá esta fin de semana unha nova edición do Sinsal Primavera. Angélica Salvi, Ece Canli, Superorganismus, proxecto musical de Tramontana e Luz González, e Ivankovà conforman o cartel das sesións que terán lugar os días 19 e 20 de maio no MARCO de Vigo. Como novidade, a programación extenderase a un dos principais recintos de música ao vivo da localidade, a Sala Radar, que acollerá o concerto da portuguesa Ana Lua Caiano na noite do sábado 20.

Sinsal Primavera propón visualizar propostas musicais singulares e únicas, vinculadas á experimentación e á creación contemporánea. O evento, que conta coa colaboración principal do Concello de Vigo, e co apoio do MARCO, do Instituto Camões e da Sala Radar, ofrecerá esta fin de semana unha programación conformada por cinco proxectos de vangarda liderados por seis bandas ou solistas chegadas de distintos puntos de España, Portugal, Suíza e Turquía.

Másnoticias

Vigo quiere convertir Bouzas en motor turístico y ya está diseñando nuevas experiencias

05/06/2026

El BNG busca forzar la comparecencia de Caballero por el caso Saltamontes

05/06/2026

As entradas do Sinsal Primavera están á venda na plataforma web Enterticket e o prezo da entrada anticipada para cada xornada no MARCO é de 15 euros, agás no caso dos billetes para as e os menores de 10 anos, cuxo acceso será gratuíto. Todas as persoas que posúan entrada para algún dos concertos do MARCO, poderán asistir de forma gratuíta aos concertos da Sala Radar nas noites do venres 19 ás 22:45 horas e do sábado 20 ás 23:00 horas. As entradas para estes directos tamén están dispoñibles por 8 euros anticipada e 10 euros na billeteira.

Últimas entradas para Sinsal San Simón

Por outra banda, Sinsalaudio lembra que aínda é posible adquirir algunha das últimas entradas dispoñibles para poder asistir o venres á nova edición do Festival Sinsal  2023, que se celebrará do 21 ao 23 de xullo na illa de San Simón. Tanto os abonos como as entradas do sábado 22 e domingo 23 esgotáronse ás poucas horas da súa saída á venda, tanto desde o embarcadoiro de Vigo coma desde Meirande.

Nos vindeiros días anunciarase a programación de actividades paralelas que terá lugar, de xeito gratuíto, durante a celebración do evento musical, e que inclúe tanto diferentes paseos para descubrir patrimonio natural e histórico da illa, coma outras iniciativas para afondar no coñecemento da cultura musical e de vangarda.

Programación Sinsal Primavera 

• Venres 19 no MARCO de Vigo
  20:30 horas - Angélica Salvi
  21:30 horas - Ece Canli
• Sábado 20 no MARCO de Vigo
  20:30 horas - Superorganismus
  21:30 horas - Ivankovà
• Sábado 20 na Sala Radar
  23:00 horas - Ana Lua Caiano