Sés e Iseo & Dodosound subirán ao escenario do SonRías Baixas 2019

O “furacán” Sés promete revolucionar este ano o XVII SonRías Baixas. O festival vén de confirmar a presencia da cantautora galega, que se suma ao cartel deste 2019 xunto coas novas confirmacións de Dubioza Kolektiv, Iseo & Dodosound with the Mousehunters, Hakuna Tanaka, Nius de nit e Som do Galpom, que completan a programación do festival que se celebrará o 1, 2 e 3 de agosto en Bueu.

Se hai algún fenómeno na música galega actual é SÉS. Dende o seu primeiro disco en 2011, María Xosé Silvar leva facendo oír a súa voz a cada vez máis xente, en todos os sentidos: compoñendo e interpretando cancións que van do rock á música latina e expresando co seu carisma e honestidade unha visión propia e inconformista do mundo. A cantautora galega di o que pensa e fai a música que lle peta, sen atender a prexuízos estilísticos ou políticos. Unha mestura ecléctica ben xenuína, na que hai espazo para o rock and roll de raíz blues, pero tamén para a tradición oral galega, a actitude punk e a influencia da música latinoamericana. Precisamente este mes de marzo SES publicou Rabia ao silencio, unha escolma de cancións populares, folclóricas ou de autor, nas que adapta ao galego a figuras que destacaron polo seu compromiso político e humano, como Carlos Puebla, Mercedes Sosa, Víctor Jara ou Zeca Afonso.

Másnoticias

"Primeras marcas a precios de ganga", llega a O Morrazo el outlet del verano con rebajas del 70%

19/07/2026

El mar de ardora ilumina las playas de las Rías Baixas, ¿cómo predecir cuándo se podrá ver?

18/07/2026

Pola súa parte Iseo & Dodosound son un dos nomes máis destacados da música xamaicana. Non falta no seu son a potencia dos baixos e os ritmos do dub, pero esa influencia fusiónase con elementos de trip hop ou r&b. A proxección internacional deste dúo de Pamplona non para de medrar, igual que a inspiración de composicións que seguen facendo desaparecer as fronteiras do dub ou o reggae.

Desde os lugares máis escuros de Babialonia chega Hakuna Tanaka, presentando o seu primeiro traballo, Rap&Riddims, unha explosiva combinación de hip hop e reggae. Pola súa parte, Dubioza Kolektiv chegarán dende Bosnia-Herzegovina coa súa mestura de reggae, hip hop, dub ou rock.

Pechan as novas confirmacións Nius de nit, un dos grupos emerxentes dentro do panorama musical valenciano co seu ska, rumba e reggae e os galegos de Som do Galpom, un grupo que mestura funk, rock, rap e reggae nunha proposta musical orgánica, con letras cargadas de mensaxe e de loita social.

Todos eles completan o cartel da XVII edición do SonRías Baixas, que se celebrará os días 1, 2 e 3 de agosto en Bueu. Ademais destas seis bandas, a organización do festival xa anunciara previamente a La Pegatina e la M.O.D.A, dous dos grupos da escena alternativa máis destacadas do estado; o hardcore punk de Segismundo Toxicómano e o rock urbano misturado espírito da festa balcánica de Boikot; a xira de despedida de Nao e o regreso rebelde dos Dakidarría; Muyayo Rif, unha das propostas máis vitalistas e sorprendentes da escena catalá; aos valencianos Periferia Norte, capitaneados pola poderosa JazzWoman; á mítica banda bilbaína de pop-rock en euskera Zea Mays e aos valencianos Zoo.

As entradas para o SonRías Baixas, que este ano máis que nunca programa tres intensas xornadas de música, con bandas de renome de xoves a domingo, están á venda na web sonriasbaixas.info cun prezo especial de 39 euros máis gastos os tres días de concertos, acampada incluída.