Tanxugueiras actuará este mércores nas semifinais do Benidorm Fest tras recuperarse da covid

As Tanxugueiras actuarán nas semifinais do Benidorm Fest que lles pode abrir as portas de Eurovisión. O trío galego vén de confirmar que actuarán este mércores na primeira das dúas semifinais do festival despois de recuperarse dúas das súas compoñentes, Aida Tarrío e Olaia Maneiro, da Covid-19.

Nun comunicado, a formación indica que Sabela Maneiro, Aida Tarrío e Olaia Maneiro poderán actuar neste festival no que se escollerá ao participante de España en Eurovisión 2022. Alí, presentarán o seu directo de 'Terra', que acumula máis de catro millóns de reproducións en plataformas dixitais.

Másnoticias

La gallega Hydn, entre los 12 favoritos para representar a España en Eurovisión 2023

18/08/2022

RTVE desvela el voto individual del jurado y confirma que Tanxugueiras arrasó con 70,75% del televoto

02/02/2022

Así, a maior parte do equipo xa se atopa en Benidorm para facer as primeiras probas para a actuación. Na tarde deste luns celébrase un ensaio xeral, no que participarán Sabela Maneiro e Aida Tarrío --quen chega nesta xornada á localidade alacantina--. A elas sumarase nas próximas horas Olaia Maneiro.

A través das redes sociais, Tanxugueiras explicou que as dúas cantantes contaxiadas están "ben" e "recuperándose". Están "a desexar chegar para poder compartir" con todo o público a súa canción, 'Terra', "en vivo". "Estamos moi agradecidas por todo o agarimo das e dos eurofans e do público. Acompáñanos un equipo fantástico e esperamos devolverlle á xente co noso directo toda a enerxía que nos está transmitindo", apuntan nun comunicado.

Espectáculo

Laura Iturralde, Marta Verde, Fran Sieira, Iago Pico, Silvia Iria Miramontes, Jorge de Álvarez e Miguel Bling completan o equipo que acompaña ás pandeireteiras neste espectáculo que "conxuga o tradicional co contemporáneo en todos os seus elementos".

O espectáculo conta coa dirección da escenógrafa Laura Iturralde ('Ósmose', con Mercedes Peón) e a coordinación xeral de PlayPlan Cultural, que tamén asume a dirección de produción. A profesora de danza Silvia Iria Miramontes coordinará os movementos de Tanxugueiras e o coreógrafo e bailarín Fran Sieira é o responsable de deseñar o baile no escenario.

O músico e produtor Iago Pico (responsable de Pouland Studios e coautor, con Tanxugueiras, de 'Terra') encargarase da percusión electrónica. O vestiario é obra do deseñador ourensán Jorge de Álvarez (finalista nos Premios Nacionais de Moda en 2021), mentres que a maquillaxe será unha proposta de Miguel Bling (director do 'You Glow Salon').

Por último, o espectáculo complétase con audiovisuais da artista visual e creativa galega Marta Verde (profesora no Berklee Collage of Music de Valencia).

Posibilidades ante o contaxio

En todo caso, o Benidorm Fest deseñou tres posibles escenarios no caso de que os intérpretes non poidan actuar en directo após dar positivo en covid.

O primeiro deles é se o artista dá positivo após realizar o primeiro ensaio, algo que non é aplicable a Tanxugueiras xa que os primeiros ensaios comezan este luns. O segundo escenario tampouco sería posible para o grupo galego xa que consistiría en pór o videoclip da canción a modo de participación. Con todo, 'Terra' non ten videoclip publicado.

O terceiro escenario, por tanto, sería o aplicable ás artistas e nel "RTVE realizaría unha montaxe coa canción e imaxes do artista das que dispoña", tal e como explica o propio Benidorm Fest na súa páxina web.

Ademais, o festival explica na súa web que a xefa da delegación, Eva Mora, explicou nunha rolda de prensa previa ao Benidorm Fest que "debido á crise sanitaria provocada polo coronavirus, foi imposible gravar actuacións de reserva".