Tui celebra o outono cunha Feira da Cabaza ao longo de todo o mes de outubro

Exposicións, demostracións gastronómicas ou visitas guiadas compoñerán a programación da I Feira da Cabaza que dende esta fin de semana e ao longo de todo o mes de outubro renderá tributo a este froito do outono.

A programación desenvolverase nas parroquias tudenses, dende Areas a Baldráns pasando por Caldelas, Guillarei, Paramos, Pazos de Reis, Pexegueiro, Randufe e Rebordáns. Unha mostra de produtos que irá medrando semana a semana, e na que se poderán ver múltiples variedades de cabazas, e algunhas de gran tamaño.

Esta fin de semana, sábado e domingo ás 17:30 horas, terá lugar ruta inaugural no tren turístico da Eurocidade no que viaxarán polas parroquias as autoridades e membros da organización. As vindeiras fin de semana repetiranse estas viaxes para que o público en xeral poida achegarse as distintas mostras abertas nos centros culturais.

A Feira pecharase o sábado 30 e o domingo 31 de outubro en Tui centro cunha gran exposición e venda de cabazas e actividades paralelas con obradoiros tanto para público infantil coma adulto. A cabaza será a protagonista das receitas que cociñarán os chefs Iván Méndez e Alejandro Iglesias dentro do proxecto Eurochef de Eurural. Tamén o tudense Miguel Rodríguez, xefe de cociña do Parador de Tui e Baiona, fará unha demostración gastronómica con este produto. Súmanse a esta iniciativa os establecemento de restauración que durante o mes de outubro incluirán nas súas cartas pratos con cabaza.

Tamén cada fin de semana continuarán as visitas guiadas a pozas e regadíos nas parroquias que leva a cabo o club AndaTui.

A concelleira de Comercio, Ana Mª Núñez, destacou na presentación desta iniciativa xurdida da man de Telmo Alfaya e Carlos Picho no Bar Pancho en Randufe que “este ano pretende dar un salto cualitativo e cuantitativo para impulsar a posta en valor de este produto e tamén recuperar unha tradición que forma parte da nosa historia.”

I Feira da Cabaza

Lugares de exposición

• Areas – Centro Cultural
• Baldráns – Casa da escola
• Caldelas – Multiusos da Comunidade de Montes
• Guillarei – Centro Cultural
• Paramos – Local no Monte das Penizas
• Pazos de Reis – Centro Cultural
• Pexegueiro – Centro Cultural
• Randufe – Pancho Cultural
• Rebordáns – Centro Cultural

Rutas Guiadas

• Sábado, 2 de outubro ás 10 h. Paramos. Saída dende o Alto das Penizas
• Domingo, 3 de outubro ás 10 h. Caldelas. Saída dende o local da Comunidade de Montes na ribeira
• Sábado, 9 de outubro, ás 17 h. Guillarei. Saída dende o casa cultural
• Domingo, 10 de outubro, ás 10 h. Rebordáns. Saída dende a casa cultural
• Martes, 12 de outubro, ás 10 h. Randufe. Saída dende o adro da Guía
• Sábado, 16 de outubro, ás 17 h. Pazos de Reis. Saída dende casa cultural no Anxo
• Domingo, 17 de outubro, ás 10 h. Pexegueiro. Saída dende a casa cultural
• Sábado, 23 de outubro ás 17 h. Baldrans. Saída dende a casa cultural
• Domingo, 24 de outubro, ás 10 h. Areas. Saída dende a casa cultural
• Domingo, 31 de outubro, ás 10 h. Tui centro. Saída dende o Paseo da Corredoira

Inscrición en clubandatui@gmail.com) ata o dia anterior da visita .