Poesía en galego para ilustrar unha das grandes avenidas de Vigo

"A golpes de mar desancóranse as palabras da boca” é o novo verso que ilustrará o histórico valo de Pereira na Avenida de Beiramar. A autora da cita é a poeta galega Miriam Reyes, Premio Nacional de Poesía 2025, quen se incorpora así á listaxe de autores e autoras que participaron nesta iniciativa cultural impulsada pola compañía desde o ano 2012. A frase é do poema que abre o seu libro “Con”.

A presentación oficial do novo valo tivo lugar este mércores a bordo do Argos Pereira, nun acto no que participaron representantes da empresa e a propia autora. “Cada ano buscamos que este valo sexa algo máis que unha intervención visual. Queremos que sexa tamén unha maneira de reivindicar a nosa identidade, a nosa relación co mar e o vínculo de Pereira coa cultura galega. É unha satisfacción contar nesta edición cunha voz tan singular e recoñecida como a de Miriam Reyes”, sinalou Ruy Andrade, director de comunicación do Grupo Pereira.

Másnoticias

En marcha el gran supermercado que aterrizará en el centro de Vigo

03/06/2026

Los 'mini pisos' se instalan en Vigo, el 25% en alquiler miden menos de 60 metros

03/06/2026

Pola súa banda, Miriam Reyes destacou a forza simbólica do mar ligada tanto á vida orgánica como á vida interior, subliñando que a identidade galega pasa polo mar, tamén a trasatlántica. Ademais, engadiu que o mar e os produtos do mar están relacionados para ela co gran amor do seu avó, nado en Cuba, fillo de lucenses, co que percorría as beiras das praias viguesas, de nena, e cazaba cangros. O valo poético é para ela unha maneira de volver atoparse co mar da súa infancia, que garda como un tesouro. 

Ruy Andrade destacou tamén a boa acollida que esta proposta cultural segue tendo entre a cidadanía viguesa. “Ano tras ano recibimos mensaxes de persoas que agardan con interese a renovación do valo e que valoran que unha empresa como Pereira aposte por integrar a poesía e a cultura galega nun espazo tan visible e tan ligado á cidade. Para nós, ese apoio é o mellor estímulo para continuar impulsando esta iniciativa”.

Miriam Reyes, Premio Nacional de Poesía 2025

Miriam Reyes naceu en Ourense e aos oito anos emigrou a Caracas, onde residiu ata os vinte e un. En 2001 publicou Espejo negro (DVD, 2001). O seu segundo poemario, Bella durmiente, foi finalista do Premio Hiperión (2004). Despois chegaron os títulos: Desalojos (Hiperión, 2008), Haz lo que te digo (Bartleby, 2015), Prensado en frío (Malasangre, 2016) e Sardiña (Chan da Pólvora, 2018). O seu título máis recente, Con (La Bella Varsovia, 2024), recibiu o Premio Nacional de Poesía 2025. A finais de 2025 publicou a súa primeira novela, La edad infinita (Tránsito), na que explora o proceso transformador que provoca a migración.

A súa obra foi recollida en numerosas antoloxías nacionais e internacionais e traducida a máis de media ducia de linguas. Tamén traduciu ao castelán poetas de lingua galega, catalá e portuguesa. Desde o ano 2001 experimenta coa reescritura audiovisual do poema e co recital multimedia.

Un ronsel de literatura galega en Beiramar

A iniciativa do valo poético naceu en 2012 co obxectivo de unir cultura e identidade mariñeira. Desde entón, estas foron as frases e autores que ilustraron o valo de Pereira:

• 2025 – "Lobos de mar, montañas de valor", de Pedro Feijoo
• 2024 – "Chamoume o mar para romper augas", de Olga Novo
• 2023 – "O paso do boi é lento pero seguro", de José Pereira Álvarez
• 2022 – "As nubes deixan no mar bicos e versos para soñar", de Antonio García Teijeiro
• 2021 – "O mesmo mar fai cada día unha distinta praia", de Yolanda Castaño
• 2020 – “Podo temer a morte, pero non quero ter medo a estar vivo”, de Domingo Villar
• 2019 – “O tempo, o sol e o mar engurraran o rostro do mariñeiro e cuartearan a súa pel como terra seca”, de Domingo Villar
• 2018 – “Neste mar navegan os barcos da nosa vida”, de Ledicia Costas
• 2017 – “Estamos en la bahía de Vigo y sólo de usted depende que pueda conocer sus secretos”, de Julio Verne
• 2016 – “A maxia de saber amar”
• 2015 – “Cada palada cuenta”
• 2014 – “No importa el frío, no se nos congelará el corazón”
• 2013 – “Un mar de sabores”
• 2012 - “Este mar nos ha llevado al mundo”