Vandalizan en Vigo o mural feminista de Gran Vía das sete "pioneiras" viguesas

Ataque ao arte e, sobre todo, atentado contra un mundo sen desigualdades. A Marcha Mundial das Mulleres de Galiza denunciou a agresión contra o mural que o colectivo fixo coas Tamborililás na Gran Vía de Vigo. A obra, composta por sete mulleres pioneiras de Vigo e da súa contorna que loitaron pola igualdade, amenceu este luns coas pintadas de “Stop Feminazis”. “Condeamos a misoxinia, machismo e fascismo deste ataque”, sinalan dende as redes sociais do colectivo.

A denuncia ao ataque machista non remata aí. “Tinguiremos todos os muros de lilás porque o feminismo non para até que todas sexamos libres!”. O mural situado na Gran Vía de Vigo, deseñado por Eva Casals, foi inaugurado o pasado 12 de abril. A obra está protagonizada por sete mulleres pioneiras, sete loitadoras pola igualdade que amosaron que as mulleres non precisan dos homes para acadar os seus obxectivos. Na peza artística están retratadas Olimpia Valencia, Placeres Castellano, Corona González Santos, Saladina, Rosario Hernández “A Calesa”, Carmen González “A Picoña” e Urania Mella.

Másnoticias

Vigo ya tiene fecha y hora para convertir Castrelos en un cine de verano gratuito, ¿qué pelis podrás ver?

16/06/2026

Caballero exige 9 millones a la Xunta por ser Vigo "más importante" que la capitalidad de Santiago

16/06/2026

Un tributo a sete mulleres que foron, son e serán un exemplo. sete mulleres de Vigo e da contorna que iniciaron un camiño que toca seguir percorrendo para acadar esa igualdade real pese a ataques como os que sufriu o mural situado na Gran Vía de Vigo, precisamente un espazo de Vigo que hai pouco máis de dous meses acolleu a multitudinaria mobilización polo 8M. A Asociación “Nós Mesmas” tamén lamenta o ataque e sinala que “na adversidade seguiremos cara diante, aínda máis fortes, aínda máis unidas que antes!!”.

Quen son as "pioneiras" do mural da Gran Vía?

• Olimpia Valencia (Baltar, 1898 – Vigo, 1987). Foi a primeira galega licenciada en medicina e especialista en xinecoloxía. En febreiro de 1937 foi detida e pasou catro días no cuartel da Garda Civil acusada de pertencer ao Partido Galeguista e de ter trato con xente de esquerdas.
• Placeres Castellanos (Ponte Caldelas, 1896 – Vigo, 1971). Foi unha mestra republicana, enfermeira, xornalista e guerrilleira da Resistencia francesa contra os nazis. Foi a primeira muller militante da Agrupación Socialista de Vigo.
• Corona González Santos (Laracha, 1875 – Vigo, 1972). Foi unha filántropa e unha das primeiras fotógrafas galegas. De formación autodidacta, a súa obra pasou desapercibida ata que a revisión das reportaxes fotográficas na revista “Vida Gallega” e a doazón ao Museo de Pontevedra de cento vinte e sete copias fotográficas permitiron coñecer e valorar a súa obra.
• Saladina, muller trans durante o franquismo. Viuse obrigada a vivir ás marxes da sociedade nun tempo na que as realidades LGBT eran marxinadas e discriminadas.
• Rosario Hernández "La Calesa" (Vigo, 1916-1936), vendedora de xornais e socialista, foi torturada e asasinada con so 20 anos nun cuartel de Falange en 1936.
• Carmen González "A Picona" (Aldán, 1906-1998) Foi unha curandeira e facilitadora de abortos cando esta práctica podía supoñer a entrada en prisión.
• Urania Mella (Vigo, 1899 – Lugo, 1945). Foi unha política galega, muller ilustrada e progresista. Presidenta da Unión de Mulleres Antifascistas de Vigo e filla do pensador anarquista vigués, Ricardo Mella. Tras o golpe de Estado do 36, ela e o seu home, Humberto Solleiro, tentaron defender Lavadores, máis acabaron fuxindo a Redondela, onde foron detidos. Foi condenada a morte polos fascistas e pasou nove anos secuestrada en prisión pola ditadura. A súa pena foi finalmente conmutada, non así a de Humberto, que foi fusilado.