Sandra González (BNG): "A futura biblioteca será un antes e un despois na educación e cultura de Tomiño"

Que motivos lle das ás veciñas e veciños de Tomiño para que apoien a súa candidatura o vindeiro 26 de maio?

Fomos capades de cambiar Tomiño, de facelo crecer e evolucionar. Logramos que as veciñas e veciños se sintan orgullosos de vivir aquí. Ofrezo solvencia, renovación e novos compromisos nos que imos traballar.

Másnoticias

Ocho artistas y varias horas de música en directo en un festival de música gratuito en Tomiño

06/07/2025

El folklore tomará Tui con conciertos, certamen de gaitas y un "Día da Muiñeira" este finde

04/07/2025

Como imaxinas o Tomiño de dentro de catro anos?

Imaxino un Tomiño con grandes espazos públicos e coas parroquias melloradas. Ofrecendo novas alternativas para o saneamento e cunhas traídas de auga exemplares como xa son en Galicia. Imaxino unha nova biblioteca e unha cidade dos nenos e das nenas. A verdade e que temos propostas para que Tomiño sexa un referente no Baixo Miño. Xa o somos e queremos darlle un empuxón. Coa cantidade de proxectos que temos xa con cofinanciamento a punto de saír estamos en pleno sprint de cambio.

Cales son os retos culturais de Tomiño?

Traballamos durante dous anos nun proxecto longo como é a nova biblioteca de Tomiño. Xa temos o proxecto e queremos que sexa o corazón da vida cultural do concello. Máis alá, queremos seguir traballando nunha programación estable que se converteu nunha referencia no teatro, na música e nas actividades para os máis pequenos. E por último, é importante seguir colaborando coas asociación que fan unha gran labor no concello. Son os eixos fundamentais.

Cree que a ausencia de Centristas de Tomiño pode beneficiar ao BNG?

Son cauta facendo prognósticos, non me gusta nada. O día 26 soamente haberá dúas alternativas: votar ao goberno que transformou Tomiño ou á volta ao pasado cando Tomiño era aquel lugar entre Tui e A Guarda onde non pasaba nada. Os veciños teñen que escoller entre esas dúas alternativas. Nós gobernamos cos Centristas de Tomiño durante catro anos e foi unha experiencia positiva, os tres partidos estivemos á altura. Eu lle pediría aos seus votantes que apoiaran ao goberno que eles iniciaron cambiando Tomiño no 2007.

Cal sería un bo resultado?

Será o que decidan os veciños e veciñas. Para o BNG e para min sería renovar o apoio maioritario que tivemos. O noso equipo pasou de catro a dez concelleiros e renovalo sería un éxito.

E un mal resultado?

Que non haxa participación. Se a xente non se implica no futuro do seu concello, a súa administración máis próxima, sería pésimo. Hai que ir a votar e decidir.

Débese potenciar o turismo baixo a marca do Río Miño?

A tendencia é a evitar o microturismo dende os concellos potenciándoo con entidades máis grandes. Por iso estamos no xeodestino e no proxecto de Visit Rio Minho. O Concello aporta natureza e patrimonio. É un eixo vertebrador. O río estivo esquecido. Levamos tempo traballando nunha senda que una a extensa ribeira do Miño. Xa temos o estudo de impacto ambiental. Son proxectos lentos, pero o importante é non pararse para poder sacalos adiante. Hai que ter proxectos de largo alcance.

Continuará afondando na relación da Eurocidade?

É un instrumento crucial para lograr novos fondos europeos. Europa está poñendo recursos e a ollada nas fronteiras como lugares dinámicos. Queremos estar aí. Temos os deberes feitos para que no próximo cadro eurocomunitario Tomiño tamén pinte. O obxectivo é traballar en común, coordinadamente e complementariamente.

Que lles aporta aos veciños?

Aporta programas de deporte, os orzamentos participativos transfronteirizos e a riqueza dun territorio de dous países e dúas culturas. Un territorio con moitas posibilidades e moito futuro. Estamos entre Vigo e Porto, os dous grandes motores económicos.

A oposición critica que a acción do goberno centrouse nos centros urbanos en detrimentos das parroquias.

Hai servizos que soamente se poden dar nun lugar. Unha cuestión de intelixencia é que hai que centralizar servizos como escolas infantís, centros de días, comercio... Iso significa que se fan cousas nas parroquias? Non. Estamos replicando este pequeno modelo nas prazas e nas contornas das igrexas ou arredor dun centro cultural. Nas parroquias tamén hai que mellorar camiños, traballar coas traídas de auga e coa asociación cultural de cada unha. A crítica é un mantra da oposición ante a falta de proxectos propios.

Lograches unha maioría absoluta amplísima. Como se logra?

Se consigue traballando coa xente. Escoitamos o que teñen que dicirnos. Moitas veces é bo, pero outras tantas é malo. Son críticas que escoitamos para corrixir. Estamos no día a día das persoas. Estou nas parroquias, na praza, no súper, nos bares... como unha persoa normal e corrente como é obvio.

Que se xoga Tomiño?

Xógase un novo impulso neste cambio que experimentamos. Quedar no sitio estancado ou seguir avanzando. En Tomiño o mellor está por vir, é o lema da campaña. Fomos capaces de xestionar máis de 4 millóns de euros en proxectos que están aquí. Están adxudicados e van a saír. Non falamos de proxectos utópicos.

Se tiveras que pedir un desexo para Tomiño?

Que so veciños e veciñas estean cada día máis orgullosos de vivir aquí e que sintan orgullo de Tomiño porque é exemplar, dinámico e con futuro. É a idea que nos trouxo ao goberno. Estamos a conseguilo.

Que proxecto lle gustaría liderar en Tomiño nos próximos catro anos?

Quédome con dous. Un que non se ve e outro que si. O primeiro é o apoio que damos ao departamento de Benestar e as familias e persoas que teñen unha discapacidade, persoas maiores, nenos con problemas, mulleres que sofren violencia de xénero. Quero seguir traballando con máis e mellores medios. O segundo é a futura biblioteca, que será un antes e un despois na educación e cultura no noso concello.

BNG TOMIÑO