Cinco festas de San Xoán en Vigo que van máis alá dunha fogueira

En Vigo este San Xoán arderán máis dunha vintena de fogueiras coas que prenderán os malos espíritos e deixaremos atrás conxuros e meigallos para iniciar o verán renovados. A oferta é moi variada e cada barrio contará coa súa propia celebración, pero a continuación destacamos cinco festas de San Xoán que son máis que prender unha fogueira: música e gastronomía protagonizarán estas celebracións que nos deixan unha fin de semana de festa.

Pode interesarche: Mapa de fogueiras de San Xoán en Vigo

Másnoticias

Llega al centro de Vigo un súper con "horarios extendidos" que abrirá todos los días

20/07/2026

Pasión por Chayanne en Vigo, ¡ya hay colas para conseguir entradas para su concierto en Castrelos!

20/07/2026

Festival Son da Industria

A asociación As da Industria prepara unha fin de semana na que a música local e en galego será a gran protagonista. O festival Son da Industria ofrecerá ao longo de dúas xornadas até seis concertos que, o domingo, finalizarán co acendido da a fogueira de San Xoán.

Dende Ponteareas abrirán o festival ás 21:00 horas do sábado As Punkiereteiras, un grupo de música e canto tradicional que actualiza o folk clásico con temas reivindicativos e feministas. Seguiralle Su Garrido Pombo, cantante, músico e compositora galega premio Martín Códax da Música 2019. O seu estilo musical abrangue diversos xéneros con matices de bossa, folk, jazz ou latin.

A primeira noite do festival finalizará con Cuarta Xusta, grupo que se define por “berrar con música as inxustizas que nos rodean” e Flow do Toxo, un grupo formado por catro mulleres con clara conciencia feminista e amor polo rural.

Xa na noite de San Xoán, a xornada comezará ás 20:00 horas coa actuación infantil de Brais das Hortas, seguido dos concertos de Blues do País e Os Putos para acender a cacharela. A noite contará con sardiñada e bebida a prezos populares e todas as actuacións son de balde.

Lugar: Parque García Picher (Toys’R Us)

San Xoán Gastro en Navia

Navia volverá ser, como de costume, un dos barrios máis dinámicos da cidade olívica con múltiples actividades en torno ao San Xoán. O sábado 22 o local da asociación Novo Vigo acollerá unha charla sobre as herbas de San Xoán e posterior recollida das mesmas. Comezará ás 16:30 horas.

Xa o domingo, a rúa Ufas será o escenario dunha festa que comezará ás 20:00 horas con xogos populares e continuará coa Pándega das Teixugueiras ás 21:00 horas, dous picadiscos ás 21:30 horas e o conxuro da queimada ás 23:00 horas. O acendido da fogueira terá lugar á medianoite co meco feito por APAMP. A xornada contará tamén cun Gastro Bar con empanadas, croquetas, choripán, comida vegana e cervexa artesá.

Lugar: Rúa Ufas, Navia

Noite de fogueiras no Casco Vello

A Praza do Berbés acollerá un ano máis as celebracións de San Xoán do Casco Vello. A cita deste ano comezará ás 21:00 horas co espectáculo “Unha noite máxica” de Barafunda. Á noitiña, sobre as 22:30 horas terá lugar a saída de Akelarre que irá seguido da actuación de Ata o Mandil Dolores. Á medianoite chegará o momento do “Lume e Auga” cos Ghaiteir@s do Casco Vello.

Tamén no Casco Vello pero organizado pola Asociación Casco Vello Alto, na Praza do Abanico, haberá sardiñada, barra, música e diversión co DJ Gramola. Neste caso a cita comezará ás 18:00 horas. Dous sardiñas en pan de millo e unha empanadilla terá un prezo de 5 euros e recomendase mercar os tickets anticipados no Bar Primavera na Ronda de Don Bosco ou no Restaurante El Castro no Paseo de Alfonso XII.

Lugar: Praza do Berbés e Praza do Abanico

Noite de rock en Teis

Este 2019 os veciños de Teis propoñen a noite de “Kiss en Teis”. Aínda que parece que a banda non pasará polo barrio na súa xira mundial de despedida, seguro que os seus temas máis recoñecidos soarán na noite rockeira que tras o acendido da fogueira a medianoite prepararase da man dun particular DJ a bordo dun Citroën 2CV.

Antes, ás 22:30 horas a ambientación musical estará a cargo do Grupo de Gaitas da AA.VV. de Teis. Ao longo da noite haberá, como é natural, sardiñas asadas, pero tamén comida italiana e bebida. Tampouco faltarán as herbas de San Xoán para espantalos malos meigallos.

Lugar: Camiño dás Maceiras fronte ao Auditorio de Teis.

Embarcacións tradicionais en Canido

En San Miguel de Oia, na Festa de San Xoán dos Liñares os actos comezarán xa ás 11:00 horas coa exposición de embarcacións tradicionais no peirao de Canido e ás 13:00 horas o grupo Flashback amenizará a sesión vermú.

Áo mediodía, sobre as 14:00 horas, celebrarase un xantar popular con sardiñas, chourizos, empanadillas, “crioburguers” ou callos e xa á tardiña, ás 19:00 horas, terá lugar a segunda varada de embarcacións tradicionais e a actuación de Pandereteiras na praia de Canido.

Por último, Alberto Cunha amenizará a gran sardiñada que comezará ás 21:30 horas para, de seguido, celebrar o conxuro da queimada na gran fogueira de San Xoán. A festa celebrarase na contorna da praia de Canido, no Torreiro dos Liñares e haberá carpa e inchables infantís.

Outros San Xoán en Vigo

Entre as míticas festas de San Xoán atopámonos coa fogueira da Praza da Miñoca, que este ano contará cunha chourizada e bebidas. En Valadares celebrarán á festa dende as 22:00 horas con chourizos, viño e refrescos. Neste caso contarán coa música da Agrupación Folclórica do CVC de Valadares (a fogueira celebrarase nas inmediacións do Centro Cultural, xunto ao pavillón do Pedregal). En Balaídos, a asociación veciñal Val do Fragoso celebrará a súa tradicional fogueira (0:00 horas) con bocadillos de balde para os socios.

Pola súa parte, en Alcalbre -no Torreiro da Igrexa Vella- a festa comezará ás 21:00 horas cunha gran sardiñada e chourizos asados para, á medianoite, prender a fogueira. Dende as 20:00 horas actuará o Paiaso Pepín e diferentes actuacións musicais.

Na Asociación de Veciños de Cabral o San Xoán comezará ás 21:00 horas no local da asociación con sardiñas, chourizos, pan, viño e música. En Bembrive, o San Xoán irá acompañado de chourizos, empanada e tortilla dende as 22:00 horas no aparcamento de festas de Espedras. Amais, ten caracter solidario e todo o recadado irá integramente a financiar as colonias dos nenos e nenas do Colexio Mosteiro. En Beade, o Torreiro de Festas acollerá unha gran sardiñada dende as 21:00 horas con ración de balde para os socios das asociacións de veciños e do Círculo Cultural.