Fin de semana de San Martiño no Morrazo

Verbena, magostos e furanchos danse cita esta fin de semana en Moaña e Bueu coa celebración das festas de San Martiño.

“furancheo” en Moaña

Se por algo se caracteriza o San Martiño de Moaña, que celebra o seu 820 aniversario, é polas carpas e os furanchos nos baixos das casas. Esta fin de semana o Adro Baixo e a antiga reitoral encheranse de centos de persoas nunha das celebracións máis enxebres da nosa área.

Másnoticias

Sabucedo celebra su primera Rapa das Bestas como Bien de Interés Cultural

06/07/2025

La fiesta invade O Porriño por San Bieito con conciertos, festival de DJs y mucho más

04/07/2025

O día grande das festas chegará o sábado, 11 de novembro, cunha programación festiva que comezará as 10:00 horas e rematará coas verbenas das orquestras Televisión e Pontevedra. Nesta xornada haberá un servizo de autobús especial que sairá dende a Igrexa de Domaio ás 10:00, 11:00, 17:00, 19:00 e 21:00 horas, con recollida e baixada de pasaxeiros nas habituais paradas. O regreso será ás 14:30, 18:00, 20:00, 22:00, 0:00 e 02:00 horas.

Moita charanga e deporte en Bueu

Bueu comezará hoxe mesmo,  ás 17.00 horas, co magosto dos colexios, organizado polas ANPA dos colexios A Pedra, Virxe Milagrosa e Montemogos de Beluso. Pola noite, a partir das nove e media, a verbena estará amenizada polas orquestras Principal e D’Moda.

O sábado, a Banda de Música Artística de Bueu ofrecerá un pasarrúas pola mañá, e pola noite (a partir das 21 horas) as orquestras Brujas e Fania Blanco Show porán a música. E xa o domingo, o pasarrúas será a cargo da Charanga Imperiais, e no adro da igrexa actuará a agrupación Recordos da Nosa Terra. A partir das 19.30, Jerusalén e Distrito 7 pecharán a festa. Hai que destacar que a verbena se celebrará nos Xardíns de Urbano Lugrís (Campo da Estacada), e as atraccións estarán dispoñibles no porto.

Os festexos tamén terán unha parte deportiva, coa celebración da XXII Carreira Pedestre San Martiño, que terá lugar o 12 de novembro. A carreira, organizada polo Club de Atletismo Corredoiras e o Concello de Bueu, que será eminentemente urbana, e tomará a saída na Avda de Montero Ríos, á altura do Museo Massó.