María Casares e as Feirantas, protagonistas do Días dos Veciños do Festival de Cans

O Festival de Cans vai poñendo a punto os motores dos chimpíns este mércores, coa veciñanza de Cans como protagonista. A xente da aldea, colaboradora e partícipe, é o eixe central deste día, no que se agradece a súa inestimable contribución ao festival.

Na segunda xornada da súa semana grande, o XIX Festival de Cans inclúe un bo número de actividades e moitas emocións. A homenaxe a María Casares, coa inauguración da rúa efémera na que participarán as actrices Lidia Veiga, Mariana Carballal, Melania Cruz, Sabela Hermida e Isabel Blanco, e a estrea na Noite d@s Veciñ@s do documental colectivo As feirantas de Cans son algúns dos pratos fortes da programación deste mércores.

Másnoticias

O Porriño se vuelve viral tras enamorar a un popular influencer, "de los lugares más bonitos de España"

04/06/2026

Escolares de O Porriño se suman a la "Operación Ola" para disfrutar de jornadas de surf

03/06/2026

As actividades do 18 de maio principian ás dez da mañá coa inauguración da rúa efémera María Casares, na que as actrices Lidia Veiga, Mariana Carballal, Sabela Hermida e Isabel Blanco descubrirán unha placa co nome desta referente das artes escénicas. Ás 11:30 h no Baixo de Carlos participarán en "De María Casares a nós", título do primeiro dos clásicos coloquios AISGE, no que se falará da influencia desta grande do teatro europeo nas actrices contemporáneas.

O apartado Cans Participa inclúe a presentación do Proxecto Cans 303, o obradoiro de gravación e montaxe coordinado polo cineasta e videoartista Juanma Lodo, que busca en cada edición rescatar unha parte da memoria colectiva da aldea. Centrado nesta XIX nas mulleres que traballaban na venda ambulante, o documental As feirantas de Cans estrearase no Torreiro ás 21:30 dentro da Noite d@s Veciñ@s, xunto co videoclip "O estraperlo", dirixido por Fefi Senlle, e as actuacións de Acordecáns e das Pandereiteiras de Cans.

Primeiros pases dos Cans do Futuro

Ata o próximo venres pasarán por Cans arredor de 400 escolares, dentro das actividades dos Cans do Futuro. Comezarán este mércores ás 10:30 h no Baixo de Bugarín coa proxección das tres curtametraxes finalistas do concurso Senda Litoral, e a entrega do premio á obra gañadora desta iniciativa posta en marcha canda a Fundación Galicia Sustentable, a Secretaría Xeral de Política Lingüística e EDP Enerxías Renovables.

Dentro do marco do proxecto "Recoméndoche un libro", para estimular a lectura e a creación audiovisual en galego entre a mocidade, o Festival de Cans impulsa o concurso "Ollo de vidro". Os traballos finalistas proxectaranse ás 16.30 h no baixo de Carlos. Contará coa presenza dos concursantes, do xurado avaliador e de representantes das institucións colaboradoras.

Novas camadas, masterclass e outras homenaxes

O baixo de Carlos será tamén o espazo dunha masterclass ás 13:00 h sobre subtitulado e accesibilidade. Estarán o director Alfonso Zarauza acompañado do realizador e profesor Pablo Romero-Fresco, quen está a desenvolver unha metodoloxía sobre os procesos de subtitulación na industria audiovisual galega.

Tamén alí, a partir das 18;30 h, será a quenda da categoría a concurso Novas Camadas, que o festival inclúe desde fai dous anos co ánimo de promover a autoras e autores que realicen a súa primeira obra, e que teñan menos de 25 anos. Nesta XIX edición, son 8 as curtas finalistas, que poderán visionarse por primeira vez no marco dun festival. Antes, no Torreiro de Cans os e as realizadoras destas obras participarán no primeiro dos encontros Dálle caña!.

Música de cine da Banda Municipal do Porriño ás 19 h no Parque do Cristo, a descuberta do traxe do Can de Pedra na rotonda de entrada á aldea ás 20.30 h e a colocación da placa de Marisol Troncoso e Alfonso González ás 21:00 h no muro dos chimpíns, completan esta emotiva xornada previa á apertura oficial do XIX Festival de Cans.